ОХУ-д хуурамч архинаас болж 30 гаруй хүн нас барснаас хойш 10 хүрэхгүй хоногийн дараа үүнтэй төстэй хэргээр дахин 18 хүн амиа алджээ.
ОХУ-ын Холбооны мөрдөн байцаах хороо орон нутгийн цагаар 16-ны өдөр хийсэн мэдэгдэлдээ, Екатеринбург хотод 18 хүн метанол агуулсан архи уусны улмаас хордож нас барсан талаар Ройтерс агентлаг мэдээлжээ.
Метанолыг ихэвчлэн үйлдвэрлэлийн зориулалтаар ашигладаг бөгөөд хүний биед хортой бодис юм. Хохирогчид өнгөрөгч 7-оос 14-ний өдрийн хооронд бүлэг этгээдүүдээс хуурамч архи худалдаж авсан нь тогтоогджээ. Уг бүлэг этгээдүүдийн хоёр нь одоогоор хоригдож байгаа бөгөөд үлдсэн сэжигтнүүдийг эрэн сурвалжилж байгаа аж.
Өнгөрөгч 7-ны өдөр Оренбург мужийн өмнөд хэсэгт 36 хүн хуурамч архинд хордон нас барсан хэрэг гараад удаагүй байсан билээ. Мөн өнгөрсөн жил Алс Дорнодын нэгэн тосгоны долоон оршин суугч метанол агуулсан гар ариутгагч бодис уусны улмаас нас барсан бол 2016 онд Сибирийн 77 оршин суугч денатурат спирт агуулсан ванны бүтээгдэхүүн уусны улмаас амиа алдаж бхйсан юм.
ЗХУ задран унасны дараачаас эхлээд 2000-аад оны эхэн үе хүртэл ОХУ-ын эдийн засгийн хүнд байдлаас болж олон хүмүүс хуурамч архи болон үйлдвэрийн зориулалттай спиртэнд хордож нас барах тохиолдол байнга гардаг байв.
Гэтэл сүүлийн үед энэ мэтчилэн хуурамч согтууруулах ундаанаас үүдэлтэй хэргүүд байнга гарах болсон нь ОХУ-ны эдийн засгийн байдал барууны орнуудын зүгээс авч буй урт хугацааны хориг арга хэмжээ болон цар тахлаас болж хүндэрч буйг харуулж байна гэжээ. Тодруулбал, эдийн засгийн байдал хүнд байгаа бүс нутагт амьжиргааны өртөг нэмэгдэхийн хэрээр иргэд өндөр үнэтэй архины оронд хуурамч архи худалдан авах нь ихсэх болсон тухай мэдээлжээ.
Эх сурвалж: MBC