Скандинавын гурван орон болох Дани, Швед, Норвеги улсууд хүн хоорондын зай барих болон амны хаалт зүүх зэрэг цар тахлын хорио цээрийн дэглэмүүдийг аажим аажмаар сулруулсаар байгаагийн дотор тус улсуудын агаарын тээврийн компаниуд орон нутгийн цагаар 18-ны өдрөөс эхлэн нислэгийн үеэр амны хаалт зүүх журмыг цуцлах болсноо мэдэгдэв.
Deutsche Presse-Agentur (DPA) агентлагийн мэдээлснээр, Дани, Норвеги, Швед улсуудаас ирж, буцаж буй зорчигчдыг 18-ны өдрөөс эхлэн Скандинавын орнуудын дөрвөн агаарын тээврийн компани онгоцонд суухдаа амны хаалт зүүхийг шаардахаа больжээ. Scandinavian Airlines, Norwegian Air, Wiederoe Air, Flyer Airlines зэрэг агаарын тээврийн компаниуд энэхүү шийдвэрийг хэрэгжүүлж буй юм.
Тус агаарын тээврийн компаниудын энэхүү шийдвэрийг хэрэгжүүлэх болсон шалтгаан нь дээр дурдсан орнууд нь вакцинжуулалтын түвшингөөрөө дэлхийд толгой цохиж байгаатай холбоотой гэж DPA тайлбарлав. Гэхдээ дээрх орнуудаас бусад улс руу нислэг хийж буй тохиолдолд амны хаалт зүүх журам хэвээр мөрдөгдөнө гэж нэмж онцолжээ.
Эх сурвалж: YTN