Зөвхөн АНУ-аар тогтохгүй дэлхийн цахилгаан автомашины зах зээл дээрх томоохон компаниудын өрсөлдөөн улам ширүүсч байна.
Японы Тоёота Мотор компани АНУ-д цахилгаан автомашины батерей үйлдвэрлэхэд 2030 он хүртэл 3.4 тэрбум ам.долларын хөрөнгө оруулалт хийхээ мэдэгджээ. Тус компани нь хөрөнгө оруулалтын нарийвчилсан төлөвлөгөөгөө танилцуулаагүй боловч юуны түрүүнд АНУ-ын нутаг дэвсгэр дээр баригдаж 2025 он гэхэд үйлдвэрлэлээ эхлүүлэх төлөвлөгөө бүхий батерейны шинэ үйлдвэрт 1.29 тэрбум ам.долларын хөрөнгө оруулалт хийхээр шийджээ. Тоёота дэлхий даяар батерейны үйлдвэр барихад 9 тэрбум ам.долларын хөрөнгө оруулалт хийхээ өмнө нь мэдэгдэж байсан юм.
Тоёотагаас гадна дэлхийн дөрөв дэх том автомашин үйлдвэрлэгч Стеллантис компани нь LG Energy Solutions компанитай хамтран мөн АНУ-ын нутаг дэвсгэрт жилийн 40 ГВтц хүчин чадалтай цахилгаан автомашины батерейны хамтарсан үйлдвэр байгуулах болсноо зарлаад байгаа юм. Стеллантис хөрөнгө оруулалтын хэмжээгээ тодорхой хэлээгүй боловч 40ГВтц-ийн хүчин чадлыг харгалзан 35 тэрбум ам.долларын хөрөнгө оруулалт хийх болно гэж салбарынхан тооцоолжээ.
Эх сурвалж: SBS