Австрали улсын Виктория мужид коронавирусийн эсрэг вакцин хийлгэхээс татгалзсан 43 цагдааг үүрэгт ажлаас нь чөлөөлжээ. Улмаар тэднийг шийдвэрээ өөрчлөхгүй болбоос ажлаас нь халах хүртэл арга хэмжээ авч болзошгүй байгаа гэнэ.

Виктория мужийн хувьд энэ сарын 15-ы өдрөөс эхлэн яаралтай тусламжийн бүх ажилчид, цагдаа нарыг вакцинд хамрагдсан байх шаардлага хэрэгжүүлж эхэлсэн бөгөөд баасан гарагаас өмнө дор хаяж вакцины нэг тунд хамрагдсан байх ёстой гэсэн журам гаргажээ.

Тийнхүү мягмар гарагт тус мужид үүрэг гүйцэтгэдэг 34 цагдаа, 9 нийтийн хэв журам сахиулагч нарыг үүрэгт ажлаас нь чөлөөлсөн байна. Одоогоор цагдаа нарыг тус бүрчлэн ямар шалтгааны улмаас вакцинд хамрагдаагүй болохыг судалж байгаа бөгөөд эрүүл мэндийн асуудлаар вакцинд хамрагдаагүй бол шалтгааныг хүндэтгэн үзэх юм. Харин хүндэтгэх шалтгаангүйгээр вакцин хийлгээгүй бол ажлаас нь халах хүртэл арга хэмжээ авах ажээ.

Эх сурвалж: CNN