АНУ-д дөрвөн настай бяцхан хүү 20 гаруй метрийн өндөртэй хадан хавцалаас унаад азаар бага зэргийн шалбархай, хөхрөлт төдий үүссэнийг эс тооцвол өөр ямар нэгэн бэртэл гэмтэл аваагүй талаар Ассошиэйтед Пресс агентлаг орон нутгийн цагаар 18-ны өдөр мэдээлэв.

Мэдээнд дурдсанаар, хүү өнгөрөгч 15-ны амралтын өдөр эцэг эхтэйгээ АНУ-ын Кентакки мужийн Улаан голын хавцал дахь “Princess Arch” нэртэй газрын ойролцоо авирч байхдаа халтирч 21 метрийн өндрөөс унасан байна.

Тус бүс нутгийн уулын аврах албаныхан мэдээлэхдээ, хүү унахдаа биеийнхээ хэд хэдэн хэсгийг хаданд цохьсон гэж хэлсэн хэдий ч аврах багийнханыг хэргийн газарт очиход тэрээр ямар нэгэн хүнд бэртэл аваагүйгээр барахгүй, юу болсон тухайгаа өөрөө ярьсан байна.

Аврах албаны төлөөлөгч Дрю Стивенсон “гайхалтай нь хүү хэдхэн газарт хөхөрснийг эс тооцвол өөр ямар нэгэн бэртэл авсангүй” хэмээн баярлан өгүүлжээ. Хүүг аварсны дараа шууд эмнэлэгт хүргэж, нарийн шинжилгээнд оруулсан ба биеийн байдал сайн байгаа аж.

Лексингтоноос зүүн өмнө зүгт 42,000 акр (17,000 га) талбайг хамарсан Улаан голын хавцал нь элсэн чулуун нуман хаалга, өндөр хад хосолсон байгалийн үзэсгэлэнт тогтоц бөгөөд жил бүр хэдэн зуун мянган уулчид, жуулчид зорьж ирдэг байна.

Эх сурвалж: SBS