Гар утсан дээрээ суулгасан аппликэйшнаар дамжуулан хоол захиалж, тасалбар худалдан авах нь ердийн үзэгдэл болоод удаж байгаа билээ. Тэгвэл Ромын пап лам Францис таныг утасныхаа аппликэйшнаар дамжуулан залбирал үйлдэхийг хүсэж, “Click to Pray” буюу “залбирах бол дараарай” гэсэн аппликэйшны шинэчилсэн хувилбарыг зах зээлд нийлүүлжээ.

Улмаар аппликэйшны тусламжтайгаар католик шашинтнууд дэлхийн өнцөг булан бүрээс бурхантай холбогдох боломжтой болж байгаа гэж үзэж байгаа юм. Өдгөө 84 настай Ромын пап Францис өөрөө ч цахим орчинд идэвхтэй нэгэн тул залбирлыг цахимжуулснаар өөрийн шашныг бусдад таниулахад нэмэртэй гэдгийг ч илэрхийлсэн байна.

Анх 2016 онд цахим орчинд нийлүүлж байсан тус аппликэйшн ирэх сарын нэгний өдрөөс шинэчлэгдсэн хувилбараар хэрэглэгчдэд хүрэх гэнэ.

Аппликэйшны туршилтыг гэлэн болон гэлэнмаа нарын дунд хийсэн юм. Одоогийн байдлаар аппликэйшны хуучин хувилбарыг дэлхий даяар 2.5 сая хүн татан авсан байгаа ажээ.

Шинэчлэгдсэн хувилбар нь долоо хэл дээр ажиллах бөгөөд хэрэглэгчдийг залбирлын цагаа тохируулах, өдрийн залбирал үйлдэх, тодорхой үйл явдалд тохирсон залбирлыг уншихад туслах гэнэ.

Эх сурвалж: ABS-CBN