АНУ-д 6.3 кг жинтэй нярай мэндэлж, олны анхаарлыг татаж байна.
Өнгөрөгч 4-ний өдөр АНУ-ын Аризона мужийн нэгэн эмнэлэгт Кэрри Патонай, Тим Патонай нарын гэр бүлд гурав дахь хүү Финли нь төржээ. Нярайг төрөх мөчид эмнэлгийн ажилтнууд гайхаж хоцорсон байна. Учир нь Финли эхээс мэндлэхдээ 6.3 кг жинтэй, 60.3 см өндөр байсан юм. Хүүг төрөхөөс өмнө ээж Кэррид эмч нар ураг нэлээд жин ихтэй байна гэж сануулж хэлж байсан ч бодит байдал дээр төсөөлснөөс давсан жин ихтэй нярай гарчээ.
Хосуудын урьдчилан бэлдсэн живх, хувцас хэтэрхий жижиг байсан тул дахин шинэ хувцас хэрэглэл худалдаж авах шаардлагатай болсон бөгөөд өдгөө 3 долоо хоногтой Финли 9 сартай хүүхдийн хувцас өмсөж байгаа гэнэ.
Хосууд гурван хүүхэдтэй ба эхнэр Кэрри нь энэ хугацаанд 19 удаа зулбаж байжээ. Сэтгэл нь маш их түгшиж байсан хэдий ч Финли хүүтэйгээ ингэж эрүүл саруул уулзсандаа маш их баярлаж байгаагаа Кэрри онцолжээ.
Интернет хэрэглэгчид уг мэдээний доор сэтгэгдэлээ үлдээхдээ "Долоо хоногийн дараа хөлд орох байхаа, бумбайчихаад үнэхээр хөөрхөн юмаа, бараг том хүн төрүүлсэн байна шүү дээ, ээж нь их өвдсөн байх даа, гайхалтай юмаа” гэх зэргээр бичжээ.
Эх сурвалж: SBS