Сүүлийн 30 жилийн хугацаанд Японы бодит цалин бараг л хэвээндээ байсан тухай судалгааны үр дүн гарчээ.
Асахи сонинд 20-ны өдөр нийтэлснээр Эдийн засгийн хамтын ажиллагаа, хөгжлийн байгууллагын (OECD) 2020 оны худалдан авах чадварын үнэлгээний тайланд үндэслэн Японы бодит цалин жилд 4.24 сая иен (1 доллар = 110 иен) байгаа ба энэхүү үзүүлэлтээрээ тус байгууллагын 35 гишүүн орнуудын дунд 22-р байранд жагссан тухай онцолжээ.
Ингэснээр 1990 онтой харьцуулахад 30 жилийн хугацаанд ердөө 180,000 иен буюу 4.4%-иар өссөн байгаа юм. Энэ хугацаанд АНУ болон Их Британийн бодит цалин 47.7%, 44.2%-иар тус тус өссөн байна. Харин БНСУ-ын бодит цалин дунджаар 1,9 дахин өссөн байна.
Тус улсад 1990-ээд оны эхээр хөөс хагарсны дараа эдийн засаг хөгжил урт хугацааны уналтанд орсон бөгөөд одоо ч үргэлжилсээр байгаа юм. Үүнийг "алдагдсан 30 жил" гэж нэрлэдэг аж.
Олон улсын валютын сангийн (ОУВС) зүгээс гаргасан улс орнуудын дотоодын нийт бүтээгдэхүүний (ДНБ) өсөлтийн эмхэтгэлийг харвал сүүлийн 30 жилийн хугацаанд Хятад 37 дахин, АНУ 3.5 дахин, Герман 2.3 дахин өссөн бол Япон ердөө л 1.5 дахин өссөн байна.
Эх сурвалж: Yonhap