Шинэ Зеланд улсын Уэллингтон мужид 4 настай хүү цагдаад дуудлага өгч, тоглоомуудыг нь шалгаж өгөхийг хүссэн тохиолдол гарчээ. Хэдийгээр бага насны хүүхдийг яаралтай түргэн тусламж, онцгой байдлын дугаарууд руу онцын шаардлагагүй бол залгахгүй байхыг зөвлөдөг ч хүүгийн дуудлагыг авсан оператор цааш мэдээлэхэд нэгэн цагдаа очоод шалгаад ирье гэжээ.

Тийнхүү цагдаагийн ажилтан хүү дээр очиж, тоглоомуудыг нь шалгачхаад хамтдаа зургаа даруулж, яриаг нь цахим хуудаснаа нийтэлсэн байна.

Хүүгийн дуудлагыг сийрүүлбэл:

-Цагдаагийн газраас ярьж байна. Хаана тусламж хэрэгтэй байна вэ? гэхэд хүү эргэлзэнгүй хэсэг азнаснаа,

-Сайн уу? Цагдаа эгч үү? гэвээс операторын хоолой илүү өхөөрдсөн шинжтэй болж,

-Тийм байна. Юу болсон бэ?

-Мм, Би танд нэг зүйл хэлж болох уу?

-Болно оо.

-Надад танд үзүүлэх тоглоом байна.

-Чамд надад үзүүлэх тоглоом байна аа?

-Тийм ээ, та хүрч ирээд үзээд өгөөч хэмээжээ. Тийнхүү хүүгийн яриаг сонссон нэгэн эр утсыг аван төвөг удсандаа хүлцэл өчих зуур оператор цааш холбогдон,

-4 настай хүү цагдаад өөрийнхөө тоглоомыг үзүүлэхийг хүсэж байна гэхэд нэгэн цагдаа,

-Би очъё хэмээжээ.

Чингээд Констабл Курт гэх цагдаа хүүгийн хаягаар очиж, тоглоомуудыг нь үзэж өгөөд яаралтай тусламжийн дугаар руу ямар нөхцөлд залгаж болох тухайд боловсрол олгох яриа өрнүүлсэн гэнэ. Харин хэрэг явдлын дэлгэрэнгүйг хүлээн авсан сошиал медиа хэрэглэгчид хүүгийн яриаг өхөөрдөж, цагдаа нарын хандлагыг сайшааж, цахим орчноо эерэг сэтгэгдлийг түгээжээ.

Хүүгийн яриаг бүрэн хэмжээгээр нь сонсохыг хүсвэл:

Эх сурвалж: AP News