Ням гарагт Тайванийн зүүн хойд хэсэгт хүчтэй газар хөдлөлт болжээ.

Улмаар Тайванийн цаг уур судлалын хүрээлэнгээс мэдээлснээр газар хөдлөлт 6.5 магнитудын хүчтэй байсан гэсэн бол АНУ-ын Газарзүйн хүрээлэнгээс газар хөдлөлт 6.2 магнитуд хүчтэй байсан хэмээсэн байна. Ямартай ч тус газар хөдлөлт Тайвань улсын хувьд энэ жил тохиосон хамгийн хүчтэй нь байсан гэнэ.

Газар хөдлөлтийн төв нь газрын гүнээс 67 километрийн алсаас эхэлсэн тул харьцангуй хохирол бага байсан юм. Оршин суугчдын мэдээлснээр чичиргээ нийт 30 секунд орчим үргэлжилсэн ажээ. Тийнхүү чичиргээ нь Тайбэй хотод хүртэл мэдрэгдсэн байна.

Аз болоход газар хөдлөлтийн төв газрын гүнээс байсан тул хохирол бараг үгүй гэнэ. Мэргэжилтнүүдийн хэлж байгаагаар тийм хэмжээний хүчтэй газар хөдлөлт газрын өнгөн давхаргаас эхтэй чичирхийлсэн бол ихээхэн хохирол дагуулах байсан хэмээжээ.

Газар хөдлөлтийн улмаас одоогоор нэг л хүн гэмтсэн мэдээлэл байгаа бөгөөд тухайн хохирогч нь чичиргээний улмаас унасан чулуунд оногдсон гэнэ.

Эх сурвалж: CNN