Япон улсын “гүнж” Мако их сургуульдаа учирсан Кэй Комуро гэх залуутай хуримлаж, өөрийн эрхэм дээд хэргэмийг алдлаа.
Япон улсын хуулийн дагуу хаан удмын эмэгтэй жирийн иргэнтэй гэр бүл болоход ийнхүү өөрийн эрхэм дээд хэргэмээс татгалздаг бол хаан угсааны эрэгтэй жирийн иргэнтэй хуримлах нь зөвшөөрөгддөг байна.
Тийнхүү Мако хаан угсааны хуримлах ёслолыг ч үйлдэлгүй, хаан удмын бүсгүйчүүдэд хуримлахад нь өгдөг инжийг ч авалгүй тусдаа гарсан гэнэ. Энэ нь түүхэндээ анхны тохиолдол бөгөөд урьд хожид дээрх хоёр ёсны аль алинаас нь татгалзаж байсан гүнж үгүй ажээ.
Хэвлэлийнхний мэдээлж байгаагаар хосууд АНУ-д очин амьдрах гэнэ. Учир нь “гүнж”-ийн нөхөр болох Кэй Комуро тус улсад хуульчаар ажилладаг юм. Тэднийг Их Британийн эрхэм дээдэс асан Харри болон Мегантай зүйрлэх хүмүүс ч бишгүй байгаа бөгөөд ноён Комурод ирэх дарамт шахалт, шүүмжүүд ч Меганы туулсан замналаас нэг их ялгардаггүй гэнэ.
Харин хосуудын гэрлэлтийг эсэргүүцсэн ард иргэд мягмар гарагт жагсаал хүртэл зохион байгуулаад амжсан байна.
Тийнхүү мягмар гарагт Мако өөрийн нөхрийн хамтаар хэвлэлийн бага хурал хийж, өөрийнх нь гэрлэлт хэн нэгэнд асуудал дагуулсан бол гүнээ хүлцэл өчиж буйгаа мэдэгджээ.
Эх сурвалж: BBC