Тайван улсын ерөнхийлөгч Цай Ин вэн Хятадаас ирэх заналхийлэл улам бүр нэмэгдэж байгаа хэмээжээ. Түүнчлэн тус улсын зүгээс Америкийн цэргүүд нутаг дэвсгэр дээр нь бэлтгэл хийж байгааг анх удаа албан ёсоор хүлээн зөвшөөрч, мэдэгдэл хийсэн байна.
Тэрээр өнгөрсөн мягмар гарагт CNN агентлагтай хийсэн ярилцлагадаа дээрх мэдээллүүдийг хэлсэн бөгөөд “Энэ 23 сая хүн амтай арлын улс өдөр бүр өөрсдийгөө мөн өөрсдийн ардчилал, эрх чөлөөгөө хамгаалах гэж хичээж байна. Хэрэв бид бүтэлгүйтвэл тэдгээр хүмүүсийн итгэл үнэмшил талаар болж, энэ бүх зүйлийн төлөө тэмцэх шаардлагатай эсэхэд эргэлзэж эхлэх болно” хэмээжээ.
Тайван, Хятад улсуудын хувьд аль 70 жилийн өмнөөс л тусдаа засаглалтай оршин тогтносон ч Хятадын зүгээс тус улсыг өөрсдийн дагуул улс гэж харахаа болихгүй байгаа юм. Улмаар хоёр улсын хоорондын харилцаа ойрын хэдэн арван жилд байгаагүйгээрээ муудсан бөгөөд өнгөрсөн сард л гэхэд Хятадаас түүхэнд байгаагүй хамгийн олон дайны онгоцыг тус улсын агаарын бүсэд нэвтрүүлсэн байна.
Тийнхүү нөхцөл байдлын хүрээнд Цай Ин вэн Хятадын эрх баригчидтай тайван замаар хэлэлцээ хийхэд бэлэн байгаагаа илэрхийлж байгаа ч БНХАУ Тайванийг өдөөн хатгасаар байгаа юм.
Эх сурвалж: CNN