Өвлийн Олимп болоход 100 хүрэхгүй хоногийн хугацаа үлдсэнтэй холбогдуулан Бээжингийн өвлийн Олимпыг зохион байгуулах хорооноос аравдугаар сарын 26-ны өдөр Олимп болон Паралимпын шагналт байранд орох тамирчдад гардуулах медалийг олонд танилцуулжээ.
2022 оны өвлийн Олимпын медалиудыг бүхэлд нь “Тон Син” гэж нэрлэх бөгөөд энэ нь “нэг бүхэл мэт хамтдаа” гэсэн утгыг илэрхийлдэг юм. Медалийн загварыг Хятадын эртний хаш чулуун голтой дугуй зүүлтнээс санаа аван урласан бөгөөд медалийн голд Олимпын таван цагираг, түүнийг тойроод цас, мөс, үүлийг дүрсэлсэн байх гэнэ.
Мөн энэ удаагийн Олимпын наадмын медалиуд 2008 оны Бээжингийн зуны Олимпын медальтай загварын хувьд ихээхэн төстэй байх юм. Учир нь Бээжин хот нь зун болоод өвлийн Олимпыг хоёуланг нь зохион байгуулсан хот болж байгаа гэдэг утгаар медалиудыг ч төстэй байлгахаар төлөвлөжээ.
Бээжингийн өвлийн Олимп ирэх оны хоёрдугаар сарын 4-өөс гуравдугаар сарын 4-ний хооронд зохион байгуулагдах юм.
Эх сурвалж: The Olympics