Сүүлийн үед шүгэл үлээгчдээс болж буланд шахагдаад байсан дэлхийн хамгийн том сошиал медиа платформыг эзэмшигч Фэйсбүүк компани нэрээ 'Meta' болгон өөрчилж байгаагийн сацуу компанийнхаа логог ч мөн өөрчилжээ.
Фэйсбүүк компанийн гүйцэтгэх захирал Марк Зукерберг орон нутгийн цагаар 28-ны өдөр зохион байгуулагдсан цахим арга хэмжээний үеэр математикийн “хязгааргүй” тэмдэглэгээний хэлбэр бүхий компанийн шинэ логог танилцуулж, мөн нэрээ ”Meta” болгон өөрчилснөө зарласан тухай Нью-Йорк Таймс сонин мэдээлэв. Компанийн Facebook, Instagram, WhatsApp зэрэг олон нийтийн сүлжээний апликейшнууд нь “Мета” гэх шинэ нэрийн дор харьяалагдах аж.
Зукерберг хэлэхдээ "Бид компанийнхаа онцлог шинж чанарын талаар маш их бодсоор ирсэн” гээд “Бид метаверс компани хэмээн хэлэгдэхийг хүсч байгаа” хэмээн онцолжээ.
Метаверс гэдэг нь бодит ертөнцтэй ууссан гурван хэмжээст виртуал ертөнцийг хэлдэг бөгөөд энэ нь Фэйсбүүкийг сошиал медиа компаниас хальж, ирээдүйн шинэ технологи, шинэ соёл иргэншлийг манлайлагч компани болгох хүсэл зоригийн илэрхийлэл гэж тайлбарлаж байна.
Эх сурвалж: MBC