Австралийн зүүн өмнөд хэсэгт орших Виктория муж, тэр дундаа Мельбурн хотод цаг агаарын аюулт үзэгдэл болж хүчтэй салхи салхилж, аадар бороо орсны улмаас олон газарт цахилгаан тасарч, нэлээд хэмжээний хохирол учирчээ.
Австралийн олон нийтийн ABC сувгийн 29-ний өдөр мэдээлснээр, өмнөх шөнө Виктория мужийн өмнөд хэсгийн хэд хэдэн хэсэгт 100 км/цагийн хурдтай салхи салхилж, хүчтэй аадар бороо орсны улмаас байшин барилга эвдэрч, гудамжны моднууд үндсээрээ булгарч унасан байна. Мөн цахилгааны шугамд гэмтэл гарснаас 160 гаруй мянган айл өрх цахилгаангүй болсон аж.
Мельбурн хотоос баруун хойд зүгт 257 км-ийн зайд орших Грампианс үндэсний цэцэрлэгт хүрээлэнд хэсэг хугацаанд 143 км/цагийн хурдтай салхи салхилж аюулт үзэгдэл болжээ. Мельбурн хотын нисэх онгоцны буудал болон хотын төвд 119 км/ц, 115 км/ц хурдтай хүчтэй салхи салхилж байсныг тогтоожээ.
Хүчтэй салхинд булгарч, хугарч унасан модод зам дээр хөглөрснөөс өнөө өглөө иргэд ажилдаа явахад ихээхэн хүндрэл учирсан байна. Галт тэрэг, автобус зэрэг нийтийн тээвэр мөн саатаж, зарим нь цуцлагдсаны улмаас замын хөдөлгөөний ачаалал эрс нэмэгджээ.
Австралийн эрчим хүчний ханган нийлүүлэгч Powercor компани "Цахилгаан хангамжийн сүлжээ нийт 100 орчим газарт доголдсон" бөгөөд "Үүнийг тэр даруй засах боломжгүй тул энэ амралтын өдрийг хүртэл цахилгаан тасрах болно" гэж мэдэгджээ.
29-ний өдрийн 10:00 цагийн байдлаар Викториа мужийн яаралтай тусламжийн албанд тусламж хүссэн 2000 гаруй дуудлага ирсэн болохыг мэдээлэв. Дуудлагын дийлэнх нь мод унасан, байшин барилга эвдэрсэнтэй холбоотой байжээ. Австралийн Цаг уурын товчооны зүгээс Мельбурн болон ойролцоох өндөрлөг газруудын оршин суугчдыг цаг агаарын аюулт үзэгдлээс сонор сэрэмжтэй байхыг анхааруулжээ.
Эх сурвалж: Yonhap