АНУ даяар ажлаасаа гарах хүмүүсийн тоо урьд жилүүдийнхтэй харьцуулахад эрс нэмэгдэж байгаатай холбогдуулан компаниуд ажиллах хүчээ алдахгүйн тулд ажилчдынхаа цалинг нэмж байна.
Улмаар тус улсад үйл ажиллагаа явуулдаг Costco гэх компани ажилчдынхаа цалинг хамгийн багадаа цагийн 17 ам.доллар байхаар шийдвэрлэсэн бол Starbucks сүлжээ кафе ирэх он гэхэд цагийн хөлсийг 15 ам.доллар болгохоо амласан юм.
АНУ-д зоогийн газрууд болон үйлчилгээний байгууллагууд хачирхалтайгаар ажиллах хүчний хомстолд орж байгаа бөгөөд наймдугаар сард л гэхэд худалдаа үйлчилгээний салбарт 1.2 сая ажлын байр, зоогийн газар, зочид буудлын салбарт 1.5 сая ажлын байр хоосон байжээ.
Тийнхүү ажилчдаа алдахаас сэрэмжилж байгууллагууд цалинг нэмэгдүүлэх арга хэмжээ авч, Walmart л гэхэд цагийн дундаж хөлсийг 16.40 ам.доллар болгож, Amazon харин 15 ам.доллар болгоод байгаа юм.
Мөн зарим тохиолдолд ажилд орохоор гэрээ байгуулсан хүнд 3000 ам.долларын ч урамшуулал олгож байгаа гэнэ.
Эх сурвалж: NPR