Долларын тэрбумтан Элон Маск НҮБ-аас үнэхээр өөрийнх нь хөрөнгийн 2 хувь дэлхийг өлсгөлөнгөөс аварч чадна гэдгийг баталбал Теслагийн хувьцааг зарж, орлогыг нь хандивлах болно хэмээжээ.

Өнгөрсөн долоо хоногт НҮБ-ын Дэлхийн хоол хүнсний хөтөлбөрийг хариуцсан ахлах Дэвид Бийзли CNN сувагт өгсөн ярилцлагадаа тэрбумтнууд ердөө 6 тэрбум ам.доллар хандивлахад үхэл амьдралын зааг дээр өлсөж байгаа 42 сая хүнийг аварч чадна хэмээн мэдэгдсэн юм. Харин мэдээллийн сувгууд түүний хэлснийг дэвэргэн, Элон Маскийн нийт хөрөнгийн ердөө 2 хувь дэлхийг өлсгөлөнгөөс аварна хэмээн мэдээлж байсан билээ.

Тэгвэл өдгөө дэлхийн хамгийн баян эрхмээр нэрлэгдэж байгаа Элон Маск өөрийн Твиттер хуудаснаа, “Дэлхийн хоол хүнсний хөтөлбөрөөс үнэхээр миний хөрөнгийн 2 хувь дэлхийг өлсгөлөнгөөс ангижруулж чадна гэдгийг баталбал, яг одоо ч хамаагүй Теслагийн хувьцаагаа зарж, би бусдыг өлсгөлөнгөөс аврах болно” хэмээн жиргэжээ.

Түүний жиргээний хариуд ноён Бийзли хандивын мөнгийг хэрхэн зарлагдах тухайд үргэлж нээлттэй байна гэдгээ амлаж, хүсвэл өөрийн шинжээчдээр ч хянуулж болно гэдгийг хэлсэн байна.

Харин тэрээр нэгэн залруулга хийх хэрэгтэйг дурдаж, “Би хэзээ ч 6 тэрбум ам.доллар өлсгөлөнгөөс ангижруулна гэж хэлээгүй” хэмээжээ. Учир нь энэ хэмжээний мөнгө ердөө нэг л удаа тэдгээр хүмүүст зарцуулагдах бөгөөд тухайн хандиваас цааш юу болохыг хэлж таашгүй юм.

Эх сурвалж: Business Insider