Талибаны дотоод хэргийн яамнаас мэдээлснээр Афганистан улсын нийслэл Кабул дахь цэргийн хамгийн том эмнэлэгт бөмбөгдөлт болж, 19 хүн амиа алдаж, 43 хүн шархаджээ.
Мягмар гарагт Сардар Мохаммад Дауд Ханы цэргийн эмнэлгийн нэвтрэх хаалганы ойролцоо 10 минутын зайтай хоёр ч удаа бөмбөг дэлбэрч, дэлбэрэлтийн дараа тухайн чигт тасралтгүй гал нээсэн байна.
Одоогоор бөмбөгдөлт болоод буудалцааны цаана хэн байсныг мэдэхгүй байгаа ч Талибан бүлэглэлийн зүгээс Ирак, Левантын Исламын улсыг буруутгасан юм. Мөн амиа золиослогч, зэвсэгт этгээдүүд тус гэмт хэргийг үйлдсэн гэж мэдээллээд байгаа ажээ.
Хэрэг дээр ажиллаж байгаа албаныхны мэдээлж байгаагаар халдлагыг нэгэн амиа золиослогч өдөөж, мотоцикл хөлөглөж ирээд эмнэлгийн үүдэнд зогсохдоо бөмбөг дэлбэлсэн хэмээсэн юм.
Талибаны Мэдээ мэдээлэл, соёлын дэд сайд Забихуллах Мужахидын хэлснээр хэргийг гарцаагүй Ирак, Левантын Исламын улсын салбар ISKP үйлдсэн бөгөөд Талибан бүлэглэлийн цэргүүд гэмт этгээдүүдээс тавынх нь амийг хөнөөж чадсан гэж мэдэгджээ.
Эх сурвалж: Al Jazeera