Ням гарагт Ирак улсын ерөнхий сайд Мустафа аль-Кадхимиг хөнөөхөөр завдаж, дрон ашиглан гэрийг нь бөмбөгдсөн хэрэг гарчээ. Улмаар хэргийн хүрээнд АНУ-ын ерөнхийлөгч Жо Байден мэдэгдэл хийсэн байна.
Түүний хийсэн мэдэгдэлд, “Ирак улсын иргэн, ерөнхий сайд Мустафа аль-Кадхимигийн амийг хөнөөх нь туйлын буруу юм. Миний хувьд ерөнхий сайд гэмтээгүйд санаа амарч байна. Түүний засаглах хэлбэрийг би хувьдаа ихэд сайшаан үзэж байгаа” хэмээжээ.
Мөн тэрээр террорист халдлагыг үйлдсэн этгээдүүд хариуцлагаа хүлээх ёстойг хэлж, “Миний зүгээс аюулгүй байдлын ажилтнууддаа Иракийн аюулгүй байдлын албаныханд шаардлагатай тусламжийг хүргэж, буруутай этгээдүүдийг илрүүлэх ажилд туслах заавар өгсөн. АНУ Иракийн засгийн газар, ард түмний бүрэн эрхт байдал, тусгаар тогтнолыг хамгаалахын тулд нарийн холбоотой ажиллах болно” гэж мэдэгдсэн юм. 
Иракийн засгийн газраас мэдээлснээр халдлагад нийт гурван дрон ашигласан бөгөөд тэдний зүгээс хоёрыг нь буулгаж чадсан ч нэг дрон ерөнхий сайдын гэрийг онилж, бөмбөг хаяжээ.
Аз болоход ерөнхий сайд ямар нэг гэмтэл аваагүй юм. Харамсалтай нь ерөнхий сайдын хамгаалалтын албанд ажилладаг 6 хүн шархадсан байна.
Одоогоор халдлагыг хэний захиалгаар үйлдсэн болох нь тодорхойгүй байгаа юм.
Эх сурвалж: The Hill