ДЭМБ-ын удирдах албан тушаалтан Туркменистан улсын коронавирусийн тайланд үл итгэж байгаагаа уламжилжээ. Туркменистан улс нь цар тахалд өртөөгүй цөөн хэдхэн улсын нэг юм.
Гэвч ДЭМБ-ын онцгой байдлын албаны дарга, доктор Катерин Смоллвүүдийн хэлснээр, “Дэлхий дахинаа коронавируст цар тахал эхлээд даруй хоёр жил болж байна. Шинжлэх ухааны үүднээс авч үзвэл Туркменистан улсад коронавирусийн тохиолдол огт бүртгэгдээгүй байх нь боломжгүй хэрэг” хэмээжээ.
Харин аналистуудын хэлж байгаагаар Туркменистан улсын албан мэдээ нь үнэхээр үнэмшилгүй гэнэ. Ингэж дүгнэх болсон шалтгааны нэг нь тус улсын засаглах хэлбэр Хойд Солонгос улсынхтай адил дарангуйлсан шинжтэй байдаг юм. Түүнчлэн Туркменистан улсын засгийн газар дата мэдээллийг нуун дарагдуулж, үнэнийг өчсөн хүмүүсийг шийтгэж байсан урт түүхтэй ажээ.
Эх сурвалж: BBC