Теслагийн ерөнхий захирал Элон Маск өөрийн хувьцаанаас 1.1 тэрбум ам.доллартой тэнцэх хэмжээний хувийг заржээ.
Тэрээр саяхан өөрийн Твиттер хуудаснаа хувьцаагаа зарах эсэх талаар санал асуулга явуулаад байсан юм. Улмаар санал асуулгад 3.5 сая хүн оролцож, 58 хувь нь түүнийг хувьцаагаа зарахыг дэмжсэн тул тэрээр өөрийн эзэмшдэг нийт хувьцааны 0.5 хувийг зарсан байна. Элон Маскийн хувьд 2016 оноос хойш хувьцаагаа огт зараагүй юм.
Түүний хувьцаагаа зарах болсон шалтгааныг нь олон нийтийн зүгээс тэрбумтнууд хангалттай хэмжээний татвар төлөхгүй байна гэсэн шүүмжлэлтэй холбож тайлбарлаад байгаа ч 0.5 хувийн хувьцаагаа зарах захиалгыг аль есөн сард хийсэн байна.
Тийнхүү Элон Маск өөрийн Твиттер хуудаснаа, “Би ердөө л Теслагийн хувьцааг эзэмшдэг, мөнгөн хэлбэрээр ямар ч ашиг хүртдэггүй. Тиймээс миний хувьд татвар төлөх ганц нөхцөл нь би өөрийн хувьцаанаас худалдах юм” хэмээн тайлбарлажээ.
Одоогоор түүний нийт хөрөнгө 280 тэрбум ам.долларын үнэлгээтэй байгаа бөгөөд хэдийгээр хувьцаагаа зарсан ч цаана нь 170 сая ширхэг хувьцаа түүний нэр дээр байгаа юм.
Эх сурвалж: BBC