Суурин утасны хэрэглээ хорин жилийн өмнөхтэй харьцуулахад илт багассан ч Их Британи улс суурин утасны киоск бүхий улаан хайрцгуудыг авч үлдэхээр чармайж байна.
Улмаар Офком харилцаа холбооны зохицуулах хорооноос киоск хайрцгийг ихэвчлэн яаралтай тусламж шаардлагатай үед, сүлжээгүй бүсүүдэд өргөнөөр хэрэглэдэг болохыг тайлбарлаж, 12 сарын хугацаанд дор хаяж 52 дуудлага хийсэн киоскуудыг ашиглалтад үлдээхээр шийдвэрлэжээ.
Мөн амиа хорлолтоос урьдчилан сэргийлэх тусгай дугаарт дуудлага бүртгэгдвэл киоскыг байгаа газарт нь үлдээх журмыг баталсан байна. Учир нь амиа хорлохоор сэдсэн хүмүүс өөрсдийн гар утасны дугаараас бус киоск машинаас тусламжийн дугаар луу залгах тохиолдол их байдаг тул амиа хорлолтоос урьдчилан сэргийлж, амиа хорлолтыг багасгах зорилгоор киоскуудыг хэрэглээнд үлдээх гэнэ.
Офкомын захирал Селина Чадхагийн хэлснээр, “Зарим байршилд байх утаснууд харьцангуй бага дуудлага хүлээж авах нь бий. Гэхдээ заасан хугацаанд тухайн киоскыг ашиглан хүүхдийн хүчирхийлэл, осол гэмтэл, амиа хорлолттой холбоотой асуудлаар дуудлага хийсэн байх аваас бид киоскыг нүүлгэн шилжүүлэхгүй” хэмээжээ.
Эх сурвалж: NPR