WikiLeaks сайтыг үндэслэгч өдгөө 50 настай Жулиан Ассанж шоронд ял эдэлж байх хугацаандаа гэрлэхээр төлөвлөжээ.

Орон нутгийн цагаар 12-ны өдөр ВВС агентлагийн мэдээлснээр, Ассанж Английн Лондон хот дахь Беллмарси шоронд ял эдэлж байх хугацаандаа эхнэр Стелла Морристай хуримын ёслол хийх зөвшөөрөл авсан байна.

Ассанж 2011 онд Морристай анх танилцсанаас хойш хоёр хүүтэй болсон хэдий ч нуугдаж бусгаж явсаар удалгүй баригдаж ял эдлэх болсноор өдийг хүртэл гэрлэлтээ батлуулж чадаагүй байсан аж. Тэрбээр Их Британи дахь Эквадорын Элчин сайдын яамнаас 7 жил зугтаж явахдаа өөрийн хуулийн багийн бүрэлдэхүүнд байсан Өмнөд Африкийн хуульч эхнэртэйгээ танилцаж, 2015 оноос хойш болзож эхэлсэн байна.

Шоронгийн ажилтан "Ассанжийн хуримд өргөдөл гаргах журам нь бусад хоригдлуудад мөрдөгдөж байсантай ижил байсан" хэмээн онцлов. Хурим хийх зөвшөөрлөө хүлээн авсны дараа түүний эхнэр Морис "Бидний гэрлэлтийн харилцаанд цаашид ямар нэгэн саад бэрхшээл гарахгүй байх гэж найдаж байна" гэжээ.

1983 оны Их Британийн гэрлэлтийн тухай хуулийн дагуу хоригдлууд шоронд хуримын ёслолоо хийхийг зөвшөөрсөн бөгөөд бүх зардлыг нь өөрсдөө хариуцдаг байна.

2010 онд АНУ-ын армийн байлдагч Брэдли Мэннинг нь Ирак, Афганистаны дайны тухай 700,000 тайлан, Төрийн департаментын нууц дипломат баримт бичгүүдийг хулгайлан Австралийн иргэн Ассанжид хүлээлгэн өгч, WikiLeaks сайтаар дамжуулан олон нийтэд ил болгож байсан юм. Үүний дараа тэрээр Их Британи дахь Эквадорын элчин сайдын яамнаас долоон жилийн турш оргон зайлсны эцэст 2019 оны дөрөвдүгээр сард баривчлагдсан билээ.

2019 онд АНУ түүнийг Сөрөх тагнуулын тухай хуулийг зөрчсөн гэх мэт 18 зүйл ангиар буруутгаж, Их Британиас шилжүүлэн өгөхийг хүссэн хэдий ч Ассанж АНУ-ын шилжүүлэн өгөх хүсэлтийг эсэргүүцэн шүүхэд нэхэмжлэл гаргаад байгаа юм.

Эх сурвалж: Asian Economy