Дэлхий даяар хагас дамжуулагчийн хомсдолд ороод буй энэ цаг үед дэлхийн томоохон автомашин үйлдвэрлэгч Tesla, GM, BMW зэрэг компаниуд сүүлийн үед зарим эд анги, функц бүрэн суурилуулаагүй тээврийн хэрэгсэлийг үйлдвэрлэн худалдаанд гаргах болжээ.
Tesla компанийн хувьд USB порт эсвэл гар утас цэнэглэх портоор тоноглогдоогүй тээврийн хэрэгслийг худалдаанд гаргаж байгаа бөгөөд зарим хэрэглэгчид энэ тухай урьдчилан мэдэлгүйгээр захиалгаа хүлээн авсан тухай цахилгаан тээврийн хэрэгслийн сэтгүүл Electrek мэдээлэв.
General Motors (GM) компани ч Chevrolet Colorado, Blazer зэрэг голлох загваруудаа халаалттай суудлын функцгүйгээр үйлдвэрлэхээр шийдсэн бол Германы BMW компани мэдрэгчтэй дэлгэцийг суурилуулаагүйнхээ төлөө хэрэглэгчдэд 500 ам.долларын хямдрал үзүүлэхээр шийдсэн тухай тус салбарын мэргэшсэн хэвлэл мэдээлийн хэрэгслүүд онцолжээ.
Хагас дамжуулагчийн хомсдол ирэх он хүртэл үргэлжлэх төлөвтэй байгаа ба Өмнөд Солонгос зэрэг зарим улсуудад тээврийн хэрэгсэл худалдан авснаас хойш нэг жил хүртэл хүлээх тохиолдол цөөнгүй гарч байгаа аж.
Эх сурвалж: YTN