Хонконгийн агаарын тээврийн Катэй Пасифик компани ХБНГУ-ын Франкфурт хотод коронавирусийн халдвар авсан 3 нисгэгчээ ажлаас нь чөлөөлжээ.
Тодруулбал, Катэй Пасифик компаниас дотоод мөрдлөг хийж, нисгэгчид нь гадаадад нислэг үйлдэх үеэрээ коронавирусийн журмыг ноцтой зөрчсөн болохыг илрүүлсэн байна.
Тэдний зүгээс хийсэн мэдэгдэлд, “Халдварын тохиолдлуудын хүрээнд хийсэн мөрдлөгийн хүрээнд бид хөлгийн баг коронавирусийн журмыг ноцтой зөрчсөн болохыг илрүүллээ. Тиймээс Катэй Пасификийн зүгээс тэдгээр ажилтнуудаа ажлаас нь чөлөөлөх болсон. Манай байгууллагын ажилчид, үйлчлүүлэгчдийн эрүүл мэнд, аюулгүй байдал бол бидний хувьд нэн тэргүүнд байх учиртай” хэмээжээ.
Гэвч Катэй Пасифик “ноцтой зөрчил” гэж чухам яг ямар үйлийг тодорхойлж байгаагаа тодруулж хэлээгүй байна. Улмаар гарсан хэргийн хүрээнд тэд байгууллагын дотоод журмаа эргэн харах болсноо мэдэгдсэн юм.
Эх сурвалж: CNN