Канад улсад арван хэдтэй өсвөр насны хүү 46 сая орчим канад доллартай тэнцэх криптовалют хулгайлсан хэрэг гарчээ. Энэ нь түүхэн дэх криптовалюттай холбоотой хамгийн том гэмт хэрэг юм.
Орон нутгийн цагаар 22-ны өдөр CBC зэрэг орон нутгийн хэвлэл мэдээллийн хэрэгслүүдийн мэдээлснээр, Канадын цагдаагийн байгууллага, АНУ-ын Холбооны мөрдөх товчоотой хамтран ажилласны үр дүнд Онтарио мужийн Хамилтон хотод амьдардаг өсвөр насны хүүг сэжигтнээр татан баривчилжээ. Өнгөрсөн оны гуравдугаар сараас мөрдөж эхэлсэн уг хэрэг бүтэн жил зургаан сарын нүүрийг үзэж байгаа юм. Сэжигтэн нь SIM swapping аргаар 46 сая канад долларын үнэ бүхий криптовалют хулгайлсан хэрэгт буруутгагдаж байгаа юм.
Хүү гар утасны хэрэглэгчийн утасны дугаарыг өөр SIM карт руу шилжүүлэх явцад нууц үгийг солих замаар уг гэмт үйлдлээ гүйцэлдүүлсэн байна. Энэ нь үүрэн холбооны операторыг мэхлэн хохирогчийн гар утсыг хулгайлсантай адил гэмт хэргийн шинжтэй үйлдэл юм. 2019 оны 8-р сард Твиттерийн гүйцэтгэх захирал Жак Дорси ч мөн ийм төрлийн гэмт үйлдлийн золиос болсноор түүний Твиттер хуудсанд арьс өнгөөр ялгаварлан гадуурхсан элдэв бүдүүлэг бичлэгүүд нийтлэгдэж байсан юм.
Сэжигтэн өөрийн хулгайлсан их хэмжээний криптовалютаар онлайн тоглоомын эрх худалдаж авсан гэх мэдээлэл гарсан байна. Орон нутгийн цагдаа нар үлдсэн 7 сая канад доллартай тэнцэх хэмжээний криптовалютыг хураан авсан ба сэжигтний нэр, нас зэргийг тодорхой зарлаагүй байна. Уг хэргийн хохирогч нь Америк хүн гэхээс өөр мэдээлэл мөн өгөөгүй байна.
Эх сурвалж: Chosun