Сингапур улсын Худалдаа, үйлдвэрлэлийн сайдын лхагва гарагт мэдээлснээр тус улсын эдийн засаг энэ оны гуравдугаар хагаст өнгөрсөн оны мөн үетэй харьцуулахад 7.1 хувиар өссөн байна.

Түүний хэлснээр энэхүү өсөлт нь тооцоолсноос ч илүү байсан гэнэ. Учир нь тус яамны зүгээс энэ улиралд эдийн засаг 6.5 хувийн өсөлттэй байна гэж таамаглаад байжээ. Тийнхүү яамны зүгээс бүтэн жилийн төлөвлөгөөндөө өөрчлөлт оруулж, энэ онд эдийн засгаа 6-7 хувийн өсөлттэй болгохыг зорьсон байна.

Олон улсад коронавирусийн цар тахал эрчимтэй тархаж байх үед Сингапур улс хариу арга хэмжээг эрчимтэй авч, нөхцөл байдлыг хяналтдаа оруулсан ч нийт хүн амын 85 хувь нь вакциндаа бүрэн хамрагдсан хойно коронавирусийн цар тахал газар авч, эдийн засаг нь хохирол амсжээ.

Харин өдгөө тус улсын засгийн газраас гадаадын болон дотоодын нислэгээ аажмаар нээж, эдийн засгаа сэргээхийн тулд бүхий л чадлаараа хичээж байгаа юм.

Эх сурвалж: CNBC