Шведийн тавилга үйлдвэрлэгч алдарт IKEA компани сарын 99 иен буюу 0.86 ам.долларын үнэтэй түрээсийн бичил байрыг Японы Токио хотод нээжээ.

Орон нутгийн цагаар 25-нд IKEA Токиогийн Шинжүкү дүүрэгт 10 квадрат метр талбайтай байрыг сарын 99 иенээр түрээслэхээр төлөвлөж байгаа талаар CNN суваг мэдээлэв. Тус орон сууцыг IKEA компанийн тавилга, дагалдах хэрэгслээр тохижуулсан аж.

Энэхүү байр нь ирэх сарын 3-ны өдрийг хүртэл түрээслэгчдийн хүсэлтийг хүлээж авах бөгөөд түрээсийн гэрээний хугацаа 2023 оны 1-р сарын 15 хүртэл юм. Тус байрыг түрээслэгч нь 20 ба түүнээс дээш настай байх, мөн ус, хий, цахилгаан гэх мэт зардалыг өөрөө хариуцна гэсэн ерөнхий шалгууртай аж.

IKEA нь уг төслийнхөө талаар онцлохдоо "Босоо орон зайг ашиглах нь хамгийн чухал шийдэл байсан ба орон зайг гурван хэмжээст болгон хувааснаар хязгаарлагдмал орон зайд шинэ боломжуудыг бий болгож чадсан” гэжээ.

Токио бол дэлхийн хамгийн шигүү хүн амтай хотуудын нэг бөгөөд жижиг хэмжээтэй орон сууцны чиг хандлагыг нэвтрүүлэх тал дээр тэргүүлж байгаа талаар CNN суваг онцлов.

Энэ нь IKEA компани үл хөдлөх хөрөнгийн бизнест анх удаа хөл тавьж байгаа явдал биш юм. Өмнө нь Шведийн барилгын Skanska компанитай хамтран Boklok нэртэй венчур компани байгуулж, Швед, Финланд, Норвеги зэрэг улсуудад хямд өртөгтэй угсармал байшингуудыг хэрэглээнд нэвтрүүлж байсан удаатай билээ.

Эх сурвалж: YTN