АНУ-ын цахилгаан машин үйлдвэрлэгч Тесла компани Германд барьж буй цахилгаан автомашины батерейны үйлдвэрт төрөөс татаас авах хүсэлтээ цуцалжээ.
Тесла орон нутгийн цагаар 26-ны өдөр Германы эрх баригчдад дээрх байр сууриа илэрхийлсэн тухай Ройтерс агентлаг мэдээллээ.
Өнгөрөгч 1-р сард Европын холбоо Хятадын батерейны импортын хамаарлыг бууруулж, Тесла болон BMW компаниудын батерейны үйлдвэрлэлийг дэмжих зорилгоор татаас олгох төлөвлөгөөг баталж, түүнийгээ хэрэгжүүлэхээр төлөвлөж байсан аж. Гэвч Тесла тус татаасыг хүлээн авахгүй гэдгээ мэдэгдсэн байна.
Тус компанийн Гүйцэтгэх захирал Элон Маск татаас авах хүсэлтээ цуцлахаа зарласны дараа өөрийн Твиттер хуудаснаа бичихдээ "Тесла компанийн зүгээс бүх татаасыг болих ёстой гэсэн үзэлдээ тууштай байх болно" гэж жиргэжээ. Мөн түүнчлэн цахилгаан машинаар тогтохгүй газрын тос, байгалийн хийн үйлдвэрлэлд төрөөс олгодог татаасыг болихыг тэрээр уриалав.
Эх сурвалж: Yonhap