Онлайн болзооны салбарт томоохон байр суурь эзэлдэг америкийн Match групп Tinder аппликэйшний үнэлгээг дарсан нь тогтоогдож, шүүхийн шийдвэрээр 441 сая ам.долларын нөхөн төлбөрийг аппликэйшнийг үндэслэгч нарт олгох болжээ.
Тус группийн зүгээс 2017 онд Tinder аппликэйшнийг худалдан авахдаа ердөө 3 тэрбум ам.доллароор үнэлсэн юм. Харин үүсгэн байгуулагчдын хэлж байгаагаар тухайн үед аппликэйшн 13 тэрбум ам.долларын үнэлгээтэй байжээ.
Тийнхүү тэд 2018 оны наймдугаар сард шүүхэд гомдол гаргасан бөгөөд өнгөрсөн сарын дундаас Нью Йорк хотын дээд шүүх хэргийг шүүх болсон юм. Улмаар шүүх явцын хүрээнд тэд Match группийг гэм буруутайд тооцож, нөхөн төлбөр олгуулах болжээ.
Match группийн хувьд Match.com, OKCupid, Hinge, Meetic, PlentyOfFish, Ship, OurTime гэх онлайн болзооны аппликэйшнүүдийг эзэмшдэг бөгөөд өдгөө нийт 36.6 тэрбум ам.долларын үнэлгээтэй юм.
Эх сурвалж: BBC