АНУ дахь Гүүгл компанийн ажилчид цар тахал гарснаас хойш зайнаас ажиллах болсон бөгөөд урьдчилсан шийдвэрээр ирэх оны нэгдүгээр сарын 10-ны өдөр оффис цуглаж, ажилчдын 90 орчим хувь нь оффистоо ирэн ажиллаж болохоор шийдвэрлээд байсан билээ.
Тэгвэл CNBC сувгийн мэдээлж байгаагаар, компанийн удирдлагууд шийдвэрийг эргэн харах болсон гэнэ. Цар тахал гарснаас хойш оффис цуглах товыг ийн хэд хэдэн удаа хойшлуулаад байгаа ба хамгийн сүүлд л гэхэд өнгөрсөн наймдугаар сард коронавирусийн дельта хувилбар эрчимтэй тархах үед ажилчид хүсвэл ирэх оны нэгдүгээр сараас оффис дээрээ цуглан ажиллаж болохоор тогтоод байсан юм.
CNBC сувгийн мэдээлснээр оффис цуглах болбол ажилчдад 30 хоногийн хугацаа олгох гэнэ. Дээрх хугацаанд оффисоос ажиллах хүмүүс өөрт шаардлагатай эд зүйлсээ гэрээсээ нүүлгэж гүйцэх ажээ. Мөн Гүүглийн зүгээс оффис, гэр хосолмол нөхцөлд ажиллах боломжийг ч судалж байгаагаа дурдсан байна.
Эх сурвалж: The Verge