Туркийн мөнгөн дэвсгэрт болох лирийн ханш түүхэнд байгаагүй хамгийн доод хэмжээнд хүрч, нэг лирийн доллартой тэнцэх ханш жилийн дотор 48 хувиар унаж, 13.84 болсон энэ үед тус улс дахь инфляц 21.3 хувьд хүрээд байгаа билээ.

Тэгвэл инфляцад өртсөн ард иргэд хямд талх худалдан авах гэж гудамжинд дугаарлан зогсох болжээ. Улмаар 250гр багет талх 1.25 лирийн үнээр худалдан авах гэсэн хүмүүс хэдэн арваараа дэлгүүрийн гадна зогсож харагдах болсон байна. Ард иргэд өөр дэлгүүрээс талх авч болох ч харамсалтай нь бусад дэлгүүрт инфляцаас үүдэн 250гр талх 2.50 лирээр худалдаалагдах болжээ.

Турк улсын хувьд талхны хэрэглээ маш өндөр бөгөөд айл өрх тарчиг амьдралтай байх тусам талхыг өргөнөөр хэрэглэдэг юм. Харамсалтай нь өргөн хэрэглээний бараа бүтээгдэхүүний үнэ ч ийнхүү өсөж байгаад ард иргэд чадах чинээгээрээ дасан зохицохоос өөр аргагүй нөхцөлд байгаа ажээ.

Истанбулын статистикийн хорооноос мэдээлснээр, инфляцын улмаас нэг жилийн дотор улаан буудайн үнэ 109 хувиар, наран цэцгийн тос 137 хувиар, элсэн чихэр 90 хувиар тус тус өссөн байна. Тийнхүү Истанбул хотод амьдрах өртөг л гэхэд нэг жилд 50 хувиар өссөн үзүүлэлт байгаа юм.

Эх сурвалж: Al Jazeera