Apple компани оффис цуглах товоо тодорхойгүй хугацаагаар хойшлуулж, шаардлагатай бүх ажилчдадаа гэр оффисоор ажиллах нөхцөлийг нь бүрдүүлж өгөх үүднээс тус бүр 1000 ам.доллар өгөх болжээ. Тийнхүү лхагва гарагт компанийн ажилчдад дээрх мэдээллийн тухай цахим шуудан ирсэн байна.
Харин оффис цуглах товоо хойшлуулж байгаа шалтгаан нь юу гэвээс, нэгдүгээрт АНУ даяар тархаж байгаа коронавирусийн омикрон хувилбараас сэргийлэх бол хоёрдугаарт тус компани оффисоо нүүлгэж байгаатай холбоотой ажээ.
Тэдний зүгээс энэ долоо хоногийн эхээр АНУ дахь нэрийн дэлгүүрүүдээр нь үйлчлүүлэх хүмүүсийг заавал амны хаалт зүүхийг шаардсан журам батлаад байсан юм.
Түүнчлэн цар тахал хаашаа эргэх нь тодорхойгүй байгаа энэ цагт Apple компанийн адилаар Google, Lyft, Amazon зэрэг компаниуд ч оффис цуглах товоо хойшлуулаад байгаа билээ.
Эх сурвалж: CNN