Инстаграмын зүгээс @metaverse гэх хэрэглэгчийн нэртэй хаягийг бүтэн нэг сарын хугацаанд, санамсаргүйгээр, хаасандаа хүлцэл өчжээ.

Тодруулбал, Австрали улсын иргэн, технологич, уран бүтээлч Теа-Мая Бауманны эзэмшдэг @metaverse хаяг өнгөрөгч арван-нэгдүгээр сарын 2-ны өдөр автоматаар хаагдсан байна. Улмаар Инстаграмын зүгээс хаягийг хаах болсон шалтгаанаа “өөрөөсөө өөр хэн нэгэн болж дүр эсгэсэн” гэж тайлбарлажээ.

Харин тус хаяг хаагдахаас 5 хоногийн өмнө Фэйсбүүк компани нэрээ сольж, “Мета” болоод байсан юм. Тийнхүү хаягийг эзэмшигч эмэгтэй гомдолтой байгаагаа илэрхийлж, Нью Йорк Таймс сонинд ханджээ. Түүний хэлснээр, тэрээр хаягаа 2012 онд нээж байсан бөгөөд өөрийн бүтээлч ажлыг олонд сонирхуулж, бизнесээ хөгжүүлэх зорилгоор ашигладаг байсан гэнэ.

Гэвч бүхэл бүтэн нэг сарын дараа Инстаграмын зүгээс бүсгүйгээс уучлалт гуйсан байна. Тийнхүү бүсгүй эцэст нь өөрийн хаягаа эргүүлэн авч чаджээ.

Эх сурвалж: BBC