Бэлгийн цөөнхүүдэд зориулсан Grindr болзооны аппликэйшн зар сурталчилгаа байршуулж мөнгө олохын тулд хэрэглэгчийн мэдээллийг зөвшөөрөлгүйгээр цааш худалдаалж байсан нь тогтоогдож, 7.3 сая ам.долларын торгууль ногдуулжээ.
Хэдийгээр Норвегийн мэдээлэл хамгаалах газраас тус аппликэйшний үйл ажиллагааг хариуцагч нарт анхлан 11.4 сая ам.долларын торгууль ногдуулаад байсан ч тэд санхүүгийн нөхцөл байдлынхаа тайланг тавьж, аппликэйшндаа өөрчлөлт оруулснаар торгуулийн хэмжээгээ бууруулж чадсан байна. Тийнхүү Мэдээлэл хамгаалах газраас торгуулийн дүнг бууруулсан ч энэ удаагийн хэрэг тэдний шийдвэрлэсэн хамгийн өндөр торгуультай хэрэгт тооцогдох болсон юм.
Тэдний худалдаалж байсан мэдээлэлд хэрэглэгчийн байршил, IP хаяг, нас, хүйс зэрэг багтсан байсан бөгөөд хувь хүний бэлгийн чиг хандлагын тухай мэдээллийг чандлан хадгалах тухай заалтыг зөрчсөн тул хэрэг улам хүндэрсэн байна.
Хэрэв Grindr-ийн зүгээс торгуулийн үндэслэлийг хүлээн зөвшөөрөхгүй байвал гурван долоо хоногийн хугацаанд давж заалдаж болох гэнэ.
Эх сурвалж: BBC