ОХУ-ын Төв банкны зүгээс бодлогын хүүгээ 1 нэгж хувиар нэмэгдүүлэх болсноо зарлалаа. Инфляцийг хязгаарлах зорилгоор өнгөрөгч 3-р сараас хойш тус улс нь бодлогын хүүгээ долоон удаа нэмэгдүүлээд байгаа билээ.

TAS агентлагийн мэдээлснээр, ОХУ-ын Төв банк 17-ны өдөр үндсэн зээлийн хүүгээ 7.5%-аас 8.5% болгон нэмэгдүүлж буйгаа мэдэгдсэн байна.

Тус банкны онцолсноор "инфляци өнгөрөгч 10-р сард таамаглаж байснаас өндөр байсан ба инфляцийн дарамт одоо ч үргэлжилсээр байна" хэмээжээ. “Мөнгөний бодлогын хүрээнд авч буй уг арга хэмжээ нь инфляцид нөлөөлж буй хүчин зүйлсийг хязгаарлан дөрвөн хувьд хүргэх зорилготой” гэж нэмж хэлэв.

Тус улсад хэрэглээний үнийн индекс өнгөрөгч 9-р сарын эцсийн байдлаар 7.4 хувьтай байсан бол 10-р сарын дундуур 7.8 хувь болж, энэ сарын 13-ны байдлаар 8.1 хувь болон зогсолтгүй нэмэгдсээр байгаа юм.

Эх сурвалж: SBS