Нью Йорк Таймс сонин орон нутгийн цагаар 19-ний өдөр мэдээлснээр, нээлтээ хийгээд удаагүй байгаа "Хүн аалз" кино нь цар тахлын шинэ төрлийн Омикрон хувилбар ихээр тархаж байгааг ч үл ажран дэлхий даяар 590 сая ам.долларын орлого олсон тухай онцлов.
Хойд Америкийн бокс оффисын мэдээллийг нэгтгэдэг ComScore-ийн мэдээлснээр "Хүн аалз, гэртээ харих замгүй" кино нээлтээ хийсэн эхний долоо хоногтоо 253 сая ам.долларын ашиг орлого олсон байна. Энэ нь "Хүн аалз" киноны 19 жилийн түүхэн дэх хамгийн өндөр орлого олсон үзүүлэлт болж буй юм. Түүнчлэн 357 сая долларын орлого олсон "Өшөө авагчид (Avengers): Төгсгөл (End Game)" болон 258 сая долларын орлого олсон "Өшөө авагчид (Avengers): Хязгааргүй байдлын дайн (Infinity War)" киноны дараа Холливудын түүхэнд нээлтийн борлуулалтаараа гуравдугаарт жагслаа.
Хойд Америкаас гадна 334,2 сая ам.долларыг олсноор дэлхий даяар 587,2 сая ам.долларын ашгийг олоод байгаа аж. Хойд Америкийн хамгийн том мультиплекс сүлжээнүүдийн нэг болох Cinemamark-ийн гүйцэтгэх захирал Марк Жоради "Үзэгчид цар тахлын айдсаасаа ангижирч байна” хэмээжээ.
Нью Йорк Таймс сонинд дурдаснаар "Үзэгчид цар тахлаас болж хөл хорионд байсаар соёл, урлагийн арга хэмжээгээр “цангасан” байсан нь нөлөөлсөн байж магадгүй" гэж дүгнэсэн байна.
Эх сурвалж: Chosun