Агаарын тээврийн хөлөг үйлдвэрлэлийн салбартаа дэлхийд хамгийн томд тооцогддог 2 компани АНУ-ын засгийн газарт 5G сүлжээний хүрээнд анхааруулга хүргэжээ. Тодруулбал, Боинг, Эйрбус компанийн захирлууд засгийн газрын тэргүүнүүдэд хандаж бичсэн захидалдаа, дээрх технологийн дэвшил нь агаарын тээврийн салбарт үлэмж хэмжээний сөрөг нөлөө үзүүлж болохыг дурдсан байна.
Учир нь тэдний зүгээс 5G утасгүй сүлжээг цацсанаар радио өндрийн тоолуур зэрэг агаарын хөлгийн чухал цахилгаан холболтуудад нөлөөлж болзошгүй гэж үзэж байгаа ажээ.
Ирэх оны эхэн буюу нэгдүгээр сарын 5-ны өдрөөс эхлэн AT&T, Verizon гэх АНУ-ын томоохон операторууд 5G сүлжээг цацаж, хэрэглээнд нэвтрүүлэх төлөвлөгөө гарсантай холбогдуулан тэд энэхүү захидлыг бичих болсон юм.
Улмаар нэгэн судалгаагаар, 2019 онд Холбооны агаарын тээврийн газраас 5G сүлжээний хүрээнд баталсан журам хэрэгжсэн бол зорчигч тээврийн 345 мянга, ачаа тээврийн 5400 нислэг саатах, хуваагдах, цуцлагдах байсан гэсэн тооцоо гарсан байна.
Харин утасны операторуудын хэлж байгаагаар 5G сүлжээ нь ямар ч аюулгүй хэмээж, агаарын тээврийн салбарынхан хэт сүржигнэж, олон нийтийг айдаст автуулж, бодит үнэнийг гуйвуулж байна гэжээ.
Эх сурвалж: BBC