ОХУ-ын талаас Европ руу нийлүүлэх байгалийн хийн хэмжээгээ ямар нэг нөхцөлөөр бууруулах тухай асуудлыг авч үзэх хүсэлгүй байгаагаа илэрхийлжээ.
Кремлийн хэвлэлийн төлөөлөгч Дмитрий Песковын Россия 24 сувагт мэдээлснээр, “Бид хувьдаа энэ тухайд байж болох боломжит хувилбарыг ч авч үзэх хүсэлгүй байгаа. Тиймдээ ч манай талаас байгалийн хий нийлүүлэлтийн хүрээнд хүлээсэн өөрсдийн үүргээ ном журмын дагуу биелүүлнэ” гэсэн юм.
Түүний ийн мэдэгдэл хийх болсон шалтгаан нь, Беларусь улсын ерөнхийлөгч Александер Лукашенко барууны улс орнууд Минскийн эсрэг ямар нэг хязгаарлалт тогтоовол байгалийн хийн нийлүүлэлтийг таслах болно гэсэн утга бүхий мэдэгдэл хийсэнтэй холбоотой гэнэ.
Тэрээр өнгөрөгч сарын 11-ний өдөр кабинетын уулзалтын үеэр дээрх мэдэгдлийг хийсэн юм. Улмаар Ямал-Европ хүрэх байгалийн хийн шугам Беларусь улсын нутаг дэвсгэрийг дайрч өнгөрдөг тул тэдэнд байгалийн хийг тасалдуулах боломж бүрэн байдаг ажээ. Харин ОХУ-ын ерөнхийлөгч Владимир Путин нөхцөл байдал тийм арга хэмжээ авах хүртэл муудахгүй байх гэж найдаж байгаагаа илэрхийлсэн байна.
Эх сурвалж: ТАСС