АНУ-ын гурван том авиа компани Зул сарын баяраас өмнө нислэгүүдээ цуцалжээ.
Пүрэв гарагийн байдлаар Юнайтед Эйрлайнс авиа компани омикрон хувилбарын тархалтаас үүдэн нислэгүүдээ цуцалж байгаагаа мэдэгдсэн юм. Тэдний зүгээс, “Улс даяар тархаад буй омикрон хувилбар манай хөлгийн багийн гишүүд болоод байгууллагын үйл ажиллагаанд шууд нөлөөлж байна” хэмээжээ. Тийнхүү Юнайтед Эйрлайнс нийт 150 гаруй нислэгээ цуцалж, уг арга хэмжээний хүрээнд хохирсон зорчигчдоос гүнээ хүлцэл өчсөн байна.
Харин пүрэв гарагийн орой Дельта Эйрлайнсын зүгээс мөн адил нислэгүүдээ цуцлах болсон юм. Улмаар 100 гаруй нислэгийг цуцалсан нь хэд хэдэн шалтгаантай бөгөөд омикрон хувилбарын тархалт ч үүнд багтах ажээ.
Юнайтед Эйрлайнс, Дельта Эйрлайнсын араас тэдний эгнээнд нэгдэж, нислэгээ цуцлах болсон авиа компани бол Аляска Эйрлайнс байсан юм. Тэд омикрон хувилбараас үүдэн нийт 17 нислэгээ цуцалсан ч Зул сарын баяр болохоос өмнө дахиад ч цуцалж магадгүй гэдгээ сануулжээ.
Эх сурвалж: CNN