АНУ-ын Ерөнхийлөгч Жо Байден орон нутгийн цагаар 30-ны өдрийн үдээс хойш ОХУ-ын Ерөнхийлөгч Путинтэй утсаар холбогдож ярилцах гэж байгаа талаар CNN суваг мэдээллээ.

Цагаан ордны Үндэсний аюулгүй байдлын зөвлөлийн хэвлэлийн төлөөлөгч Эмили Хорны хэлснээр "Оросын талтай удахгүй болох дипломат уулзалт зэрэг олон асуудлын талаар хэлэлцэх болно" хэмээн CNN суваг онцолсон байна.

Ерөнхийлөгч Путины хүсэлтээр энэ удаагийн яриа хэлэлцээ явагдах гэж байгаа бөгөөд ОХУ Украинтай хиллэдэг хил дээр цэргээ нэмэгдүүлснээс үүдэн үүссэн хурцадмал байдлыг намжаах арга замд анхаарлаа хандуулах төлөвтэй байна.

Мөн ОХУ-ын зүгээс аюулгүй байдалд баталгаа гаргаж өгөхийг шаардаж байгаагийн зэрэгцээ хуучин ЗХУ-ын орнуудыг АНУ тэргүүтэй Хойд Атлантын эвсэл (НАТО)-д элсүүлэхээр улайрч байгаа НАТО-гийн дорно дахинд тэлэх бодлогыг хориглохыг хүсч байгаа билээ.

Өнгөрөгч 7-ны өдөр ерөнхийлөгч Байден, Путин нар цахим хэлбэрээр уулзалт хийсэн юм.

Эх сурвалж: MBC