Элон Маскийн үүсгэн байгуулсан сансар судлалын SpaceX компани 337 сая ам.долларын нэмэлт хөрөнгө оруулалт босгосон тухай гадаадын томоохон хэвлэлүүд орон нутгийн цагаар 29-нд мэдээлэв.
SpaceX компани энэ жил хэд хэдэн удаагийн хөрөнгө оруулалт татаад байна. Өнгөрөгч дөрөвдүгээр сард 1.16 тэрбум ам.долларын хөрөнгө оруулалт босгосон юм. Эхлээд Google-ийн толгой компани болох Alphabet болон хөрөнгийн удирдлагын Fidelity компаниас өнгөрсөн 2-р сард 850 сая долларын хөрөнгө оруулалт татсан байна. Ийнхүү хөрөнгө оруулалтын эрэлт нэмэгдэхийн хэрээр татан төвлөрүүлэх хөрөнгийн хэмжээгээ ч нэмэгдүүлж, эцэст нь 4-р сар гэхэд 1.16 тэрбум ам.долларыг босгосон байна. Тухайн үед тус компани 74 тэрбум ам.доллароор үнэлэгдэж байсан юм.
Мөн өнгөрөгч 10-р сард SpaceX компани 700 сая гаруй ам.долларын хөрөнгө оруулалт босгосон тухай мэдээлэл олон нийтэд түгсэн юм. Тухайн үед компанийн үнэлгээ 100 тэрбум ам.долларыг даваад байлаа.
Хөрөнгө оруулалтын банк Morgan Stanley-ийн тооцоолсноор SpaceХ компанийн үнэлгээ 2040 он гэхэд нэг их наяд ам.долларт хүрнэ гэсэн таамаг дэвшүүлжээ.
Эх сурвалж: Asian Economy