Самсунг брендээс гаргах СоларСелл удирдлага WiFi долгионоор өөрийгөө цэнэглэх анхны удирдлага болох нь ээ. Тодруулбал, хуруу зай шаардлагагүй энэхүү удирдлага нь таны WiFi долгион цацах төхөөрөмжөөс өөрийгөө цэнэглэх долгион цуглуулж, ажиллах гэнэ.
Энэ төрлийн технологи нь урьд өмнө зарим нэг төхөөрөмжийн хүрээнд ашиглагдаж байсан ч өргөн хэрэглээний цахилгаан төхөөрөмж дээрх дэвшилтэт технологиор ажиллаж байгаа анхны тохиолдол юм.
Гэвч бусад утасгүй цэнэглэгчээр тэжээл хураадаг төхөөрөмжүүдтэй харьцуулахад энэхүү удирдлага нь заавал цэнэглэгч төхөөрөмжтэй ойр байх шаардлагагүй гэнэ. Улмаар 40 метрийн радиуст таны WiFi долгионоор өөрийгөө цэнэглэх боломжтой ажээ.
Харин WiFi долгион цацагдаагүй үед нарнаас тэжээл хуримтлуулах чадвартай юм. Учир нь удирдлагын ар талд жижиг хэмжээний нарны зайн хавтан байршсан бөгөөд хэрэглэгч хүсвэл ширээний гэрлээрээ ч цэнэглэж болох гэнэ.
Тэгвэл хуримтлуулсан цэнэгээ хаана хадгалах тухайд Самсунгийн зүгээс, “Удирдлага дотор ямар ч лити-ион зай үгүй. Үүний оронд жижиг оврын конденсатор байрлуулсан нь хангалттай хэмжээний тэжээл хуримтлуулах болно” хэмээжээ.
Мөн энэхүү удирдлага нь дахин боловсруулсан материалаар хийгдсэн бөгөөд цагаан, хар гэсэн хоёр өнгөөр худалдаанд гарах гэнэ. Тийнхүү удирдлагыг 2022 Самсунг QLED 4K, 8K зурагтуудтай хослуулан хэрэглэж болох ажээ.
Эх сурвалж: TechRadar