Хагас дамжуулагчийн хомсдол энэ онд ч үргэлжилнэ гэж дэлхийн томоохон хагас дамжуулагч үйлдвэрлэгч компаниудын удирдлагууд таамаглаж байна.

АНУ-ын хөрөнгө оруулалтын тэргүүлэх банкуудын нэг болох JP Morgan-аас зохион байгуулсан Технологи ба автомашины форумд оролцогчдын ихэнх нь хагас дамжуулагчийн хомсдол энэ оны эхний хагаст лав буурахгүй хэмээн таамаглаж байгаа аж.

Форумд оролцсон график боловсруулах төхөөрөмж үйлдвэрлэгч Nvidia компанийн санхүү хариуцсан захирал Колетт Крессийн үзэж байгаагаар хагас дамжуулагчийн нийлүүлэлт оны хоёрдугаар хагаст л бага багаар сайжирах төлөв ажиглагдана хэмээв.

Харин хагас дамжуулагч үйлдвэрлэгч GlobalFoundries компанийн гүйцэтгэх захирал Том Коулфилд ч энэ онд нийлүүлэлтийн хомсдолыг шийдэж чадахгүй хэмээн онцолсон байна.

Автомашины хагас дамжуулагч үйлдвэрлэгч ON Semiconductor компанийн гүйцэтгэх захирал Хассане Элкури мөн энэ жилийн турш эрэлт нь нийлүүлэлтээсээ давах таамгийг дэвшүүлжээ.

Эх сурвалж: SBS