Амазон компаниас баасан гарагт ажилчдадаа хандаж нэгэн мэдэгдэл хийсэн нь тус компанийн АНУ дахь салбарт ажиллагсад коронавирусийн халдвар авах аваас 7 хоног буюу нийт 40 цагийн л цалинтай чөлөө авч болохоор журамлажээ. Энэ хугацаа нь урьд 10 хоног байсан юм. Улмаар ажилчид вакцинд хамрагдсан эсэхээс үл хамааран вирусээр халдварласан тохиолдолд 7 хоногийн цалинтай чөлөө авах гэнэ.
Харин Амазоны зүгээс цалинтай чөлөөний хугацааг яагаад богиносгох болсон тухайгаа Өвчнөөс хамгаалах, урьдчилан сэргийлэх төвөөс шинэчлэн гаргасан журмыг дагасан хэмээн тайлбарлажээ. Тодруулбал, Өвчнөөс хамгаалах, урьдчилан сэргийлэх төвөөс мягмар гарагт гаргасан шинэ журамд хэрэв коронавирусийн тестээр эерэг гарсан хүнд ямар ч шинж тэмдэг илрэхгүй байвал таван өдөр өөрийгөө тусгаарлахад хангалттай хэмээсэн юм.
Гэхдээ коронавирусээр халдварлаад 7 хоног өнгөрсөн ч зовууртай байгаа ажилчид хүсвэл цалинтай чөлөөний хугацаагаа сунгах хүсэлтэй компанийн удирдлагад уламжилж болох гэнэ.
Эх сурвалж: CNN