Коронавирусийн омикрон хувилбар АНУ даяар эрчимтэй тархаж байгаа энэ цагт агаарын тээврийн компаниуд ажиллах хүчний хомсдолд орж, олон мянган нислэг цуцлагдаж байгаа тул Юнайтед Эйрлайнс авиа компани нислэгийн төлөвлөгөөндөө өөрчлөлт оруулж, нислэгийнхээ тоог цөөлжээ.

Улмаар тус компанийн захирал Скотт Кирбигийн ажилчдадаа хандсан захидалд дурдсанаар, Юнайтед Эйрлайнс компани ойрын хугацаанд үйлдэх нислэгийнхээ тоог цөөлж байгаа бөгөөд ингэснээр зорчигч үйлчилгээнд ажиллах ажилчдын тоо тогтворжих гэнэ.

Гэвч тэд яг хэчнээн нислэгийг хасаж байгаагаа мэдэгдээгүй байна.

Ойрын хугацаанд бүхээгийн ажилчид коронавирусээр өвчлөх нь эрчимтэй нэмэгдэж байгаагаас үүдэн ийнхүү товлосон нислэгээ хойшлуулах, цуцлах тохиолдол их байгаа юм.

Тийнхүү Юнайтед Эйрлайнсын ижлээр ЖетБлү Эйрвэйс компани ч энэ сарын 6-13-ны өдрүүдэд үйлдэхээр төлөвлөөд байсан 1280 нислэгээ цуцалсан байна.

Эх сурвалж: CNN