Өмнөд Америкийн Аргентин улсын инфляцийн түвшин өнгөрсөн жил 50 хувийг давжээ.
Аргентины Үндэсний Статистикийн Хорооны зүгээс (INDEC) орон нутгийн цагаар 13-ны өдөр мэдээлснээр, тус улсын хэрэглээний үнийн индекс өнгөрсөн оны 12-р сард өмнөх сараас 3.8%-иар өсч, 2021 оны инфляцийн түвшин 50.9 хувьд хүрсэн тухай онцолсон байна. Ингэснээр 2020 онд 36.1 хувиар өсч байсныг давж гарчээ.
Салбараар нь авч үзвэл ресторан, зочид буудал зэрэг үйлчилгээний салбар 65.4%, хувцас 64.6%, хоол хүнсний бүтээгдэхүүн 50.3%-иар тус тус өссөн байна.
Эдийн засгийн хямралд өртөж буй Аргентинд үндэсний мөнгөн тэмдэгт болох песогийн ханш унах, инфляци огцом нэмэгдэх зэрэг байдал сүүлийн хэдэн жилийн турш үргэлжилсээр байгаа юм. Тодруулбал, 2019 онд буюу шинэ төрлийн коронавирусийн халдвар гарахаас өмнө ч инфляцийн түвшин 53 орчим хувьтай байсан аж.
Альберто Фернандес тэргүүтэй Аргентины засгийн газрын зүгээс өнгөрсөн онд инфляцийг барихын тулд зайлшгүй шаардлагатай 1400 нэр төрлийн бүтээгдэхүүний үнийг царцаах, үхрийн махны экспортыг хязгаарлах зэрэг хэд хэдэн хяналтын арга хэмжээ авсан ч үр дүнд хүрсэнгүй.
Инфляцийн хөөрөгдөл энэ онд ч үргэлжлэх төлөвтэй байгаа бөгөөд Аргентины төв банк энэ оны жилийн инфляцийн өсөлт 54.8 хувьд хүрнэ хэмээн таамаглаж байгаа аж.
Эх сурвалж: Yonhap