Америкийн Улаан загалмай нийгэмлэг иргэдийг цусаа хандивлахыг уриалан "Super Bowl”-ын тасалбар хожих эрхтэй сугалаат хөтөлбөр эхлүүлжээ.
Америкийн Улаан загалмайн нийгэмлэгээс саяхан цусны нөөц маш ховор байгааг анхааруулахын хажуугаар 1-р сарын турш цусаа хандивласан хүмүүст “Super Bowl”арга хэмжээний тасалбар хожих боломжтой сугалаат хөтөлбөр зарласнаа мэдэгджээ.
Цусаа хандивласан бүх хүмүүс “Super Bowl”-ын тасалбар хожих сугалаанд автоматаар оролцох бөгөөд ялагч нь тус арга хэмжээний тасалбараас гадна 2 талын онгоцны тийз, зочид буудлын төлбөр, 500 ам.долларын үнэ бүхий бэлгийн карт зэрэг хожих аж. Энэхүү сугалаат хөтөлбөрийг хэрэгжүүлснээр цусаа хандивлах иргэдийн оролцоог нэмэгдүүлэхэд үр дүнгээ өгөх болно хэмээн Америкийн Улаан загалмай нийгэмлэг найдаж байгаагаа илэрхийлжээ.
“Super Bowl” нь дэлхийн хамгийн том спортын арга хэмжээний нэгд тооцогддог ба тасалбарыг олж авах нь “тэнгэрээс од шүүрэх”-тэй ижил амаргүй хэрэг хэмээн үздэг юм.
Америкийн Улаан загалмайн нийгэмлэгийн зүгээс мэдээлснээр цар тахал дэгдэснээс хойш улс орон даяар цусны донорын тоо 10 хувиар, ерөнхий боловсролын болон их дээд сургуулиудын цусны донорын тоо мөн 62 хувиар буурсан талаар онцлов. Үүнээс үүдэн сүүлийн долоо хоногт зарим төрлийн цусны нөөц нэг хоног ч хүрэхгүй болтлоо буурсан нь эмнэлгүүдэд цусыг хязгаарлагдмал нийлүүлэхэд хүргэжээ.
Америкийн Улаан загалмайн нийгэмлэгийн Лос-Анжелес дахь салбарын хэвлэлийн төлөөлөгч Рахима Шоаиб Яздани "Цусны нөөц үнэхээр анхаарал хандуулахуйц түвшинд хүрээд байна. Одоогийн нөхцөлд хэнд цус сэлбэх, хэн нь хүлээх вэ гэдгийг эмч нар шийдэх хэмжээнд хүртлээ багассан” хэмээн анхааруулжээ.
Эх сурвалж: SBS