Номхон далайн өмнөд хэсэгт орших арлын Тонга улсын ойролцоох далайн ёроолд галт уул дэлбэрсний улмаас АНУ-ын баруун эргээр цунамигийн аюул нүүрлэж болзошгүй талаар сэрэмжлүүлжээ.
CNN болон Франс Пресс зэрэг гадаадын хэвлэл мэдээллийн хэрэгслүүдийн мэдээлснээр, Америкийн үндэсний цаг уурын алба орон нутгийн цагаар 15-ны өдөр Калифорни, Орегон, Вашингтон, Аляска зэрэг АНУ-ын баруун эрэгт цунами үүсэхийг анхааруулсан байна.
Үндэсний цаг уурын алба баруун эрэг рүү чиглэсэн цунамигийн өндөр 61 сантиметр орчим байгаа бөгөөд хүчтэй давалгааны улмаас далайн эрэг орчмоор үер болох төлөвтэй байгаа тул иргэдийг наран шарлагын газар, боомт, далайн эргээс хол байхыг анхааруулжээ.
Хавай дахь Номхон далайн цунамигийн аюулаас сэрэмжлүүлэх төвөөс "Одоогоор цунами ажиглагдаж байгаа ч ямар нэгэн хохирол учраагүй бөгөөд Хавайд бага зэрэг үер болж байна" хэмээн мэдээлэв.
Үүний өмнөхөн Тонга улсын эрх баригчид нийслэл Нукуалофагаас хойд зүгт 65 км-ийн зайд далайн гүнд галт уул дэлбэрсний улмаас цунами үүсч болзошгүй хэмээн улс даяар мөн сэрэмжлүүлсэн юм.
Эх сурвалж: YTN