АНУ-ын үүрэн телефоны томоохон операторууд болох AT&T, Verizon компаниуд өнөөдөр буюу нэгдүгээр сарын 19-ний өдрөөс эхлэн АНУ-ын нутаг дэвсгэрт 5G утасгүй сүлжээг нэвтрүүлэх төлөвлөгөөгөө хэрэгжүүлэх болжээ.
Гэвч агаарын тээврийн компаниуд 5G сүлжээ нислэгийн үйл ажиллагааг доголдуулж болохыг анхааруулснаас үүдэн үүрэн телефоны операторууд 5G сүлжээг нисэх буудлын ойр орчимд цацахаа түр азнах болсон байна.
Тийнхүү тэдний зүгээс авиа компаниудын хүсэлтийг харгалзан үзэхдээ "Эрх баригч нарт 5G сүлжээг цацахаас өмнө 2 жилийн хугацаа байсан" гэж шүүмжлээд авчээ.
Улмаар AT&T компаниас гаргасан мэдэгдэлд, “40 гаруй оронд амжилттай, аюулгүй нэвтэрсэн 5G сүлжээний асуудлыг Холбооны агаарын тээврийн алба өдийг хүртэл шийдвэрлэж чадаагүй байгаад бид туйлын бухимдалтай байна. Энэ хэргийг яаралтай шийдвэрлэх хэрэгтэй. Одоогоор нөхцөл байдлыг харгалзан бид 5G сүлжээг нисэх буудлуудын эргэн тойронд цацахгүй” хэмээсэн байна.
Эх сурвалж: BBC